الثلاثاء، 22 ديسمبر 2009
الأربعاء، 16 سبتمبر 2009
ظروف ظروف ظروف أعمل إيه؟؟؟
إن شاء الله يكون ده أخر إعتذار ليا
بس أعمل إيه هى لما تكون الواحدة هى الكبيرة فى الأسرة من ناحية البنات لازم تكون دايما مشغولة
وغير كدة كمان كانت عندى إمتحانات بقالى شهر ومستمرة لبعد العيد فدعواتكم ليا إن ربنا يعديها على خير
وكمان إن الأيام دى كنا مزنوقين فى التجهيز لفرح اخويا الكبير عقبال كل شباب المسلمين اللى مش إجوز لسة واللى إجوز يارب عمره مايفكر تانى فى جواز(طبعا دى دعواية مصلحة لحبيباتى البنات)
إن شاء الله هدعيكم لفرح أخويا قريب
على العموم الحلقة التانية قريب إن شاء الله بس دعواتكم معانا وإحنا كدة فى العشرة الأواخر من رمضان
وربنا يتقبل منا الصيام والقيام ويستجيب دعائنا يارب
الأحد، 12 يوليو 2009
جهازنا إتسرق إزاى
إزيكوا ...نفسكوا تعرفوا حكاية إزاى جهازنا إتسرق قدامنا
نبدأ علطول وأحكى حكايتى
كنا قاعدين ( لا كنا نايمين) إلا لقيت ناس وبيخبطوا وبيقولوا إفتحوا وكنا الساعة 1 بعد منتصف الليل يعنى كانت نشرة الجزيرة خلصت
المهم بنقول مين...فرد وقال أمن دولة قلت أكيد جاى يحذرنا من حاجة مش أمن دولة بقى (أختكم طيبة جدا)
ففتح أخى العزيز وكنت أنا نايمة وكنت لسة نايمة من ربع ساعة من قبل مايشرفوا
أخويا جه يصحينى وبيقولى قومى ياشوشو مباحث ...أنا طبعا كنت زى اللى مضروبة على راسها وبحسبه بيهزر وبيصحينى لصلاة الفجر
فصحيت أكتر لغاية لما وعيت وقمت لبست حجابى وروحت على حجرة بابا وماما وببص على الصالة وأنا معدية كدة لقيت رجال الوطن وماسكين مكتبتنا وطبعا عمالين يرتبوا فيها ويقولولنا ناقصلكم كتب معينة لازم تجيبوها لأنها مفيدة جدا ( والحدق يفهم)
المهم أبى حبيبى دخل إتوضى وصلى ركعتين... والراجل(الظابط) بيقول فين الكمبيوتر فبابا قالوا إتفضل ودخل حجرتى اللى نالها من نصيب الأسد فى التفتيش.....وقالى إفتحى الجهاز وصحبتكم طيبة وفتحت الجهاز أنا قولت هيلعب عليه ولا حاجة وقام ناده يامحمود شيل الجثة(قصدى الجهاز) ودخل على كنوزى حبيبتى إيه بقى كنوزى ده اللى هنعرفه المرة الجاية
الحلقة القادمة...........
كنوزى وبيسأل عنى (قولت أكيد عنده عريس)
حجرة أبى
الحمام والمطبخ (أكيد كانوا جعانين)
الجمعة، 10 يوليو 2009
عدت بعد غياب طوييييييييييييييييييييييييل
السلام عليكم.....
يوووووووووووه كل شوية أتأسف على عدم متابعتى لمدونتى والله هى فعلا ظروف صعبة جدا بتخلى الواحد مش عارف راسه من رجليه (مع إنها سهلة جدا راسى فيها شعر وبعمله ديل حصان ورجلى مش فيها غير ضوافر وصوابع)
المهم .......................
أنا دلوقتى بكتب فى مدونتى حبيبتى بعد ظروف مرت على حياتى صعبة شوية منها
سفر أخى الحبيب(( أسامة)) إلى بلد الحرمين الشريفين
الصراحة أنا إلى الأن مش مستوعبه فراقه لأنه أول مرة يسيبنا ربنا يحفظه يارب ويجعل سفره سبب فى قربه لربنا أكتر وأكتر
وظروف تانية بقى مرت بحياتى الشخصية وأثرت على نفسيتى شوية لكن الحمد لله لسة برضه عندى أمل
صحيح نسيت
وغير كدة وكدة إن السبب الرئيسى أصلا لتأخرى عن الكتابة فى مدونتى هو سرقة جهازنا الكمبيوتر من بيتنا
طبعا هتستغربوا إزاى إتسرق...وكمان إيه !! قدام عنينا (أنا الصراحة بسميها سرقة)
طيب أقولكوا المرة الجاية إتسرق إزاى رغم إنها حكاية قديمة بس برضه
لسة بدعى على السارق وأقول حسبى الله ونعم الوكيل فيه
الاثنين، 9 مارس 2009
ماشاء الله ...عسل... ربنا يحميه من عين الحساد
قولت ماشاء الله لا حول ولا قوة إلا بالله.....قولها بس علشان خاطر العيل ده مش له ذنب من اللى هيحصل بسبب إن صورته معروضه كدة فى كل مكان
فى يوم من الأيام بفتح ميلى على الياهوو ألا ولقيت بقى خير اللهم أجعله خير رسالة جيالى وإسمها طرائف وغرائب
فى الطرائف كان فيه عنوان بيقول أجمل طفل وأجمل طفلة فى العالم فقلت أشوف كدة ففتحت ولقيت ماشاء الله صورة طفل على حسب المعلومات اللى مكتوبالى فى الرسالة إن الطفل ده دخل مسابقة كانت معمولة فى فرنسا لأجمل حاجة فى العالم ..الحاجة دى بيندرج تحتها أجمل طفل وطفلة ومدينة وطريق وإلخ إلخ...المهم الطفل ده جنسيته إندونيسى أو ماليزى مش متذكرة بالظبط وعنده 9 شهور فحبيت أوريكوا صورته وإنتوا تحكموا
لما بنستشهد بنروح الجنة
السلام عليكم
كلنا طبعا نعرف قناة طيور الجنة .....أنا بقى بقالى فترة مش متبعاها
بس ماشاء الله فيه أناشيد جديدة نزلت عليها وجميلة جدا ......ربنا يجزى خير كل اللى بيشارك فيها
المهم ....أنا جبت سيرة طيور الجنة ليه لأن فيه أنشودة عليها عجبتنى جدا وحبيت إنى أحطها على مدونتى بما إنى بحب الاناشيد يعنى.
الأنشودة دى على فكرة تنفع أنشودة تعليمية للأطفال بمناسبة إن عندى أختى قسم طفولة وبتفهم فى الحاجات دى وبتفيدها فى مجالها جدا برده ........تعلمهم إن الشهيد بيدخل الجنة ويعنى...تشوفوا الأنشودة وتحكموا
الاشتراك في:
الرسائل (Atom)
